⭕ شبكة مسارب الضي الإخبارية : عائشة الماجدي ( أُكذوبة وحدة تجميل المدينة ببورتسودان )

⭕ شبكة مسارب الضي الإخبارية : عائشة الماجدي

( أُكذوبة وحدة تجميل المدينة ببورتسودان )

تحدثت في مقال سابق عن الظلام الذي يُخيم على مدينة بورتسودان وخراب أعمدة الإضاءة وعن إنتشار تسعة طويلة وتردي الأوضاع البيئية بصفة عامة..

أرسلت التنبيه في بريد الأجهزة الأمنية وفي بريد والى ولاية البحر الأحمر ولكن يبدو أن هؤلاء المسؤولين طيلة وجودهم في الدوام اليومي معزومين قهوة وشاي وإستقبال العطالة في مكاتبهم لم ولن يهمهم أمر أمن الولاية الذين جلبوا لها الحُبرتجية من كل فج عميق..

عزيزي المواطن القارئ المتواجد في بورتسودان لازم تعرف بالضرورة أن مدينة بورتسودان كان بها قُرابة ( 7000 ) ألف عمود كهرباء الآن اعتقد عدد أعمدة الكهرباء العاملة (300) عمود يطفي ويولع حسب عدم الصيانة والإهتمام ..

المؤسف حقاً أن هناك وحدة حكومية إسمها ( وحدة تجميل المدينة ) والله زي ما بقول ليكم والوحدة دي عندها منصرفات ورواتب للعاملين وعربات وصرفيات وقصص طويلة تصرف على عينك يا تاجر من خزينة الدولة ولا مش كدا يا ( سحر )..

حاجة ( سحر ) دي طبعاً مديرة وحدة ( تقبيح ) المدينة قصدي تجميل المدينة وبتصرف مرتب وبتجي المكتب ( ياربي بتغيب ) مافي زول عارف المهم هي المديرة ..

لكن يا سحر كدي أسالك مرتبك دا حلال ؟
إنتي جملتي شنو في مدينة بورتسودان دي ؟
وعملتي صيانة متين وحصل عملتي مرور يوم شفتي الوضع كيف ؟
مدينة كلها أصبحت كوم نفايات !
مدينة كلها ضلام !
مدينة أعمدة الكهرباء فيها ما شغالة !
مدينة الشجر فيها متكدس وقافل الشوارع
ومتسبب في الجرائم !

إنتي يا حاجة سحر شغالة شنو !
خليني أسالك سؤال مشروع !
إنتي منو وراك ومنو مقويه بيهو ضهرك وقاعدة كاتمة في نفس الوظيفة بلا وظيفة ؟
الحاميك دا خلي يشتغل شغلك طيب
خلي ينضف الشوارع دي والأسواق
خلي ينور الشوارع ويوزع لمبات كهرباء
خلي يقطع الشجر من الشوارع..
ولا أقفلوا أسم الجنينة السيدها ميت دي !
بسبب عدم الإهتمام بشغلكم مواطنيين بورتسودان كلهم تحت وجع الأمراض وحُمي الضنك ما رحمتهم …

المهم أردد وأهمس في أُذن مكتب الرئيس البرهان أن تحسسوا بندقيتكم تسعة طويلة موجودة تحت شجر مجلس السياده
وموجودة شرق القصر بجانب الكورنيش
وموجودة في شارع مجمع الوزارات..

إذا لم يكُن المهدد لكم الجنجويد فالمهدد الآن في بورتسودان تسعة طويلة وإنتشار تسعة طويلة بشكل مخيف..

والى البحر الأحمر نااااااائم بصحى فقط للجودية ..

أما قادة الأجهزة الامنية نائمين فقط يصحوا عندما تكون للبرهان زيارة يتسابقوا أمام السيارات..
ناس تخاف ما بتختشي !

بورتسودان تحتاج مسؤول كارب قاشو بسيارته يتجول من غير حراسة في شوارع المدينة ليتابع الظلام وإنطفاء أعمدة الإنارة
وتجول المواتر في الشوارع الضيقة وأماكن الأشجار للعصابات الذي يحملوا يحملوا السلاح …

وتحتاج بورتسودان لمسؤول يزور وحدة تجميل المدينة ليتعرف على اعمالهم طيلة أيام الاسبوع …

وأخيراً —-

على مواطنيين بورتسودان أن يحفظوا أمنهم ويبقوا عشرة على بيوتهم وأطفالهم..

وعلى الفريق البرهان أن يحمي نفسه..

• وكفاية …